ਲਾਪਤਾ 328 ਸਰੂਪਾਂ ਦੇ ਮਾਮਲੇ 'ਚ ਗੰਧਲੀ ਸਿਆਸਤ ਕਰ ਰਹੇ ਨੇ ਧਾਮੀ ਅਤੇ ਬਾਦਲਕੇ

ਲਾਪਤਾ 328 ਸਰੂਪਾਂ ਦੇ ਮਾਮਲੇ 'ਚ ਗੰਧਲੀ ਸਿਆਸਤ ਕਰ ਰਹੇ ਨੇ ਧਾਮੀ ਅਤੇ ਬਾਦਲਕੇ
 

ਕਿੰਨੀ ਹੈਰਾਨੀ ਦੀ ਗੱਲ ਹੈ ਕਿ ਸਿੱਖ ਕੌਮ ਦੀ ਧਾਰਮਿਕ ਸੰਸਥਾ ਸ਼੍ਰੋਮਣੀ ਕਮੇਟੀ ਦੇ ਪ੍ਰਧਾਨ ਐਡਵੋਕੇਟ ਹਰਜਿੰਦਰ ਸਿੰਘ ਧਾਮੀ ਹੀ ਲਾਪਤਾ 328 ਪਾਵਨ ਸਰੂਪਾਂ ਦੇ ਦੋਸ਼ੀਆਂ ਨੂੰ ਬਚਾਉਣ ਲਈ ਪ੍ਰੈੱਸ ਕਾਨਫਰੰਸ 'ਚ ਝੂਠ 'ਤੇ ਝੂਠ ਬੋਲੀ ਜਾ ਰਹੇ ਨੇ ਤੇ ਕਹਿ ਰਹੇ ਨੇ ਕਿ "ਸਰੂਪ ਗੁੰਮ ਜਾਂ ਲਾਪਤਾ ਨਹੀਂ ਹੋਏ ਅਤੇ ਦੋਸ਼ੀਆਂ 'ਤੇ ਪਰਚਾ ਦਰਜ ਹੋਣਾ ਸ਼੍ਰੋਮਣੀ ਕਮੇਟੀ ਤੇ ਸ੍ਰੀ ਅਕਾਲ ਤਖ਼ਤ ਸਾਹਿਬ ਵਿੱਚ ਸਰਕਾਰੀ ਦਖਲਅੰਦਾਜੀ ਹੈ।" ਜਦ ਕਿ ਪਿਛਲੇ ਪੰਜ ਸਾਲਾਂ ਤੋਂ ਸੰਗਤਾਂ ਇਹੀ ਪੁੱਛ ਰਹੀਆਂ ਨੇ ਕਿ ਫਿਰ ਉਹ ਸਰੂਪ ਕਿੱਥੇ ਨੇ ? ਕੀਹਨੇ, ਕੀਹਨੂੰ ਅਤੇ ਕਿਸੇ ਦੇ ਕਹਿਣ 'ਤੇ ਕਿੱਥੇ ਦਿੱਤੇ ਹਨ ? ਤੇ ਹੁਣ ਉਹ ਸਰੂਪ ਕਿਹੜੇ ਹਲਾਤਾਂ 'ਚ ਨੇ ? ਵਿਖਾਓ। ਕਰਵਾਓ ਸੰਗਤਾਂ ਦੀ ਸੰਤੁਸ਼ਟੀ, ਦਿਓ ਜਵਾਬ। ਪਰ ਐਨੀ ਗੱਲ ਸੁਣ ਕੇ ਧਾਮੀ ਸਾਬ੍ਹ ਨੂੰ ਪੱਤਰਕਾਰਾਂ ਤੇ ਸੰਗਤਾਂ ਦੀ ਗੱਲ ਦਾ ਕੋਈ ਜਵਾਬ ਨਹੀਂ ਆਉਂਦਾ। ਜਦੋਂ ਸ਼੍ਰੋਮਣੀ ਕਮੇਟੀ ਬਾਦਲਕਿਆਂ ਨੂੰ ਇਹ ਪਤਾ ਹੀ ਨਹੀਂ ਹੈ ਕਿ ਉਹ ਸਰੂਪ ਕਿੱਥੇ ਨੇ ਤਾਂ ਫਿਰ ਗੁੰਮ ਹੀ ਹੋਏ! ਇਹ ਵੀ ਇਤਿਹਾਸ 'ਚ ਪਹਿਲੀ ਵਾਰ ਹੋਇਆ ਕਿ ਐਨੀ ਵੱਡੀ ਗਿਣਤੀ 'ਚ ਪਾਵਨ ਸਰੂਪ ਲਾਪਤਾ ਹੋ ਗਏ, ਤੇ ਉਹ ਵੀ ਸ਼੍ਰੋਮਣੀ ਕਮੇਟੀ ਦੇ ਹੀ ਪ੍ਰਬੰਧ 'ਚੋਂ। ਸੰਗਤਾਂ ਕਹਿ ਰਹੀਆਂ ਨੇ ਕਿ ਕੀ ਉਹ ਪਾਵਨ ਸਰੂਪ ਸ਼੍ਰੋਮਣੀ ਕਮੇਟੀ ਨੇ ਮਿਲੀਭੁਗਤ ਨਾਲ ਆਰ.ਐਸ.ਐਸ. ਜਾਂ ਡੇਰਾ ਸਿਰਸਾ ਨੂੰ ਦਿੱਤੇ ਹਨ ? ਜਾਂ ਕਿਸੇ ਹੋਰ ਸਿੱਖ ਵਿਰੋਧੀ ਡੇਰੇਦਾਰ ਨੂੰ ਦਿੱਤੇ ਹਨ ਜਿੱਥੇ ਸਿੱਖ ਰਹਿਤ ਮਰਯਾਦਾ ਬਹਾਲ ਨਾ ਹੋਣ ਕਰਕੇ ਸਰੂਪ ਨਹੀਂ ਸੀ ਦਿੱਤੇ ਜਾ ਸਕਦੇ ਪਰ ਸ਼੍ਰੋਮਣੀ ਕਮੇਟੀ ਨੇ ਚੋਰੀ-ਛਿਪੇ ਦੇ ਦਿੱਤੇ ਤੇ ਹੁਣ ਦੱਸਣ ਤੋਂ ਟਾਲਾ ਵੱਟਿਆ ਜਾ ਰਿਹਾ ਹੈ। ਜਾਂ ਫਿਰ ਇਸ ਤੋਂ ਵੀ ਕੋਈ ਵੱਡੀ ਡੂੰਘੀ ਸਾਜ਼ਿਸ਼ ਹੈ ਜਿਸ ਦੇ ਭਵਿੱਖ ਵਿੱਚ ਬਹੁਤ ਖ਼ਤਰਨਾਕ ਸਿੱਟੇ ਨਿਕਲ ਸਕਦੇ ਹਨ। ਬੇਅਦਬੀਆਂ ਦਾ ਕੋਈ ਵੱਡਾ ਮਾਮਲਾ ਸਾਹਮਣੇ ਆ ਸਕਦਾ ਹੈ! ਜਦੋਂ ਸੰਨ 2015 'ਚ ਪਿੰਡ ਬੁਰਜ ਜਵਾਹਰਕੇ ਤੋਂ ਪਾਵਨ ਸਰੂਪ ਚੋਰੀ ਹੋਇਆ ਸੀ ਤਾਂ ਸ਼੍ਰੋਮਣੀ ਕਮੇਟੀ ਅਤੇ ਬਾਦਲ ਸਰਕਾਰ ਨੇ ਓਦੋਂ ਵੀ ਚੁੱਪੀ ਧਾਰੀ ਰੱਖੀ ਸੀ ਤੇ ਦੋਸ਼ੀਆਂ 'ਤੇ ਕੋਈ ਕਾਰਵਾਈ ਨਹੀਂ ਸੀ ਕੀਤੀ, ਫਿਰ ਕੁਝ ਸਮੇਂ ਬਾਅਦ ਅੰਗ ਪਾੜ-ਪਾੜ ਕੇ ਹੋਈਆਂ ਬੇਅਦਬੀਆਂ। ਕੀ ਹੁਣ ਵੀ ਸ਼੍ਰੋਮਣੀ ਕਮੇਟੀ ਬੇਅਦਬੀਆਂ ਦਾ ਇੰਤਜ਼ਾਰ ਕਰ ਰਹੀ ਹੈ। ਸ਼੍ਰੋਮਣੀ ਕਮੇਟੀ ਆਨੇ-ਬਹਾਨੇ ਲਾ ਕੇ, ਸੱਚੀ ਗੱਲ ਛੁਪਾ ਕੇ, ਪੰਥ ਵਿਰੋਧੀਆਂ ਤੇ ਦੋਸ਼ੀਆਂ ਨੂੰ ਬਚਾਉਂਦੀ-ਬਚਾਉਂਦੀ ਆਪਣੇ ਉੱਤੇ ਹੀ ਕਲੰਕ ਲਵਾ ਰਹੀ ਹੈ। ਪੰਜ ਸਾਲ ਬਾਅਦ ਦੋਸ਼ੀਆਂ 'ਤੇ ਹੋਇਆ ਪਰਚਾ ਜੇਕਰ ਸਿਆਸਤ ਹੈ ਤਾਂ ਫਿਰ ਸ਼੍ਰੋਮਣੀ ਕਮੇਟੀ ਇਹ ਸਿਆਸਤ ਹੋਣ ਹੀ ਨਾ ਦਿੰਦੀ ਸਗੋਂ ਖ਼ੁਦ ਹੀ ਸੰਨ 2020 ਵਿੱਚ ਸ਼੍ਰੋਮਣੀ ਕਮੇਟੀ ਦੇ ਉਸ ਸਮੇਂ ਦੇ ਪ੍ਰਧਾਨ ਭਾਈ ਗੋਬਿੰਦ ਸਿੰਘ ਲੌਂਗੋਵਾਲ ਅਤੇ ਤਤਕਾਲੀ ਜਨਰਲ ਸਕੱਤਰ ਐਡਵੋਕੇਟ ਹਰਜਿੰਦਰ ਸਿੰਘ ਧਾਮੀ ਦੋਸ਼ੀਆਂ ਉੱਤੇ ਪਰਚੇ ਦਰਜ ਕਰਵਾ ਦਿੰਦੇ। ਸਿਆਸਤ ਤਾਂ ਸਗੋਂ ਓਦੋਂ ਬਾਦਲਾਂ ਨੇ ਕੀਤੀ ਸੀ ਤੇ ਉਸ ਸਮੇਂ ਕੈਪਟਨ ਅਮਰਿੰਦਰ ਸਿੰਘ ਦੀ ਸਰਕਾਰ ਨੇ ਬਾਦਲਕਿਆਂ ਨਾਲ ਯਾਰੀ ਨਿਭਾਈ ਤੇ ਦੋਸ਼ੀਆਂ ਦਾ ਕੱਖ ਨਾ ਵਿਗੜਨ ਦਿੱਤਾ। ਫਿਰ 2022 'ਚ ਭਗਵੰਤ ਮਾਨ ਦੀ ਸਰਕਾਰ ਬਣ ਗਈ ਤੇ ਸਾਢੇ ਤਿੰਨ ਸਾਲ ਤਾਂ ਇਹਨਾਂ ਨੂੰ ਵੀ ਬੀਤ ਗਏ ਤੇ ਦੋਸ਼ੀ ਲੁੱਡੀਆਂ ਪਾਉਂਦੇ ਰਹੇ। ਪਰ ਪੰਥਕ ਜਥੇਬੰਦੀਆਂ ਨੇ ਮੋਰਚੇ ਲਗਾ ਕੇ, ਤਸ਼ੱਦਦ ਝੱਲ ਕੇ, ਮਾਰਚ-ਪ੍ਰਦਰਸ਼ਨ ਕਰਕੇ ਅਤੇ ਅਦਾਲਤਾਂ ਵਿੱਚ ਕਾਨੂੰਨੀ ਲੜਾਈ ਲੜ ਕੇ, ਪੰਜ ਸਾਲ ਲੰਬਾ ਸੰਘਰਸ਼ ਕਰਕੇ ਖ਼ੁਦ ਦੋਸ਼ੀਆਂ ਉੱਤੇ ਪਰਚੇ ਕਰਵਾ ਕੇ ਸਫ਼ਲਤਾ ਹਾਸਲ ਕੀਤੀ ਹੈ। ਭਗਵੰਤ ਮਾਨ ਸਰਕਾਰ ਅਤੇ ਪੁਲਿਸ ਪ੍ਰਸ਼ਾਸਨ ਤਾਂ ਅਜੇ ਵੀ ਦੋਸ਼ੀਆਂ ਨੂੰ ਗ੍ਰਿਫ਼ਤਾਰ ਨਹੀਂ ਕਰ ਰਿਹਾ, ਉਹਨਾਂ ਪ੍ਰਤੀ ਸਾਰੀਆਂ ਸਰਕਾਰਾਂ ਨੇ ਨਰਮਾਈ ਵਰਤੀ ਹੈ। ਸ਼੍ਰੋਮਣੀ ਕਮੇਟੀ ਵੱਲੋਂ ਜੋ ਪੰਥਕ ਜਥੇਬੰਦੀਆਂ ਦੇ ਆਗੂਆਂ 'ਤੇ ਪਰਚੇ ਦਰਜ਼ ਕਰਵਾਏ ਗਏ ਸਨ ਉਹ ਵੀ ਅਜੇ ਤੱਕ ਰੱਦ ਨਹੀਂ ਹੋਏ। ਧਾਮੀ ਸਾਬ੍ਹ! ਜਦੋਂ ਸ਼੍ਰੋਮਣੀ ਕਮੇਟੀ ਹਰ ਸਾਲ 6 ਜੂਨ ਨੂੰ ਘੱਲੂਘਾਰੇ ਦਿਹਾੜੇ ਉੱਤੇ ਸੰਤ ਜਰਨੈਲ ਸਿੰਘ ਖ਼ਾਲਸਾ ਭਿੰਡਰਾਂਵਾਲਿਆਂ ਅਤੇ ਹੋਰ ਸ਼ਹੀਦਾਂ ਨੂੰ ਸ਼ਰਧਾਂਜਲੀ ਭੇਟ ਕਰਨ ਆਏ ਸਿੱਖ ਨੌਜਵਾਨਾਂ ਨੂੰ ਪੁਲਿਸ ਕੋਲ ਫੜਾਉਂਦੀ ਹੈ ਤੇ ਉਹਨਾਂ ਉੱਤੇ ਪਰਚੇ ਦਰਜ ਕਰਵਾਉਂਦੀ ਹੈ ਤਾਂ ਕੀ ਓਦੋਂ ਇਹ ਸਰਕਾਰੀ ਦਖਲਅੰਦਾਜੀ ਨਹੀਂ ਹੁੰਦੀ ? ਸ਼੍ਰੋਮਣੀ ਕਮੇਟੀ ਨੇ ਪਹਿਲਾਂ ਵੀ ਬੇਅਦਬੀਆਂ, ਘਪਲਾ ਤੇ ਹੇਰਾਫੇਰੀ ਕਰਨ ਵਾਲੇ ਦੋਸ਼ੀਆਂ ਅਤੇ ਆਪਣੇ ਮੁਲਾਜ਼ਮਾਂ ਉੱਤੇ ਵੀ ਕਈ ਵਾਰ ਪੁਲਿਸ ਕੋਲ ਪਰਚੇ ਦਰਜ ਕਰਵਾਏ ਹਨ ਕੀ ਉਹ ਸਰਕਾਰੀ ਦਖਲਅੰਦਾਜੀ ਨਹੀਂ ਹੈ ? ਸ਼੍ਰੋਮਣੀ ਕਮੇਟੀ ਵੱਲੋਂ ਥਾਪੇ ਹੋਏ ਤਖ਼ਤਾਂ ਦੇ ਜਥੇਦਾਰ ਜਦੋਂ ਸਰਕਾਰੀ ਗੰਨਮੈਨ ਰੱਖਦੇ ਹਨ ਕੀ ਉਹ ਸਰਕਾਰੀ ਦਖਲ ਅੰਦਾਜੀ ਨਹੀਂ ਹੈ ? ਜਦੋਂ ਸ਼੍ਰੋਮਣੀ ਕਮੇਟੀ ਦੇ ਇਜਲਾਸ ਵਿੱਚ ਸਰਕਾਰ ਦੇ ਬੰਦੇ ਬੈਠਦੇ ਹਨ ਕੀ ਉਹ ਸਰਕਾਰੀ ਦਖਲਅੰਦਾਜੀ ਨਹੀਂ ਹੈ ?ਜਦੋਂ 24 ਅਕਤੂਬਰ 2020 ਨੂੰ ਸ਼੍ਰੋਮਣੀ ਕਮੇਟੀ ਨੇ ਪੰਥਕ ਜਥੇਬੰਦੀਆਂ ਦੇ ਆਗੂਆਂ ਦੇ ਕੇਸਾਂ-ਕਕਾਰਾਂ ਦੀ ਬੇਅਦਬੀ ਕੀਤੀ ਅਤੇ ਡਾਂਗਾ-ਤਲਵਾਰਾਂ ਨਾਲ ਕੁੱਟਿਆ-ਵੱਢਿਆ ਤੇ ਫਿਰ ਉਹਨਾਂ ਉੱਤੇ ਪੁਲਿਸ ਕੋਲ ਪਰਚੇ ਵੀ ਦਰਜ ਕਰਵਾ ਦਿੱਤੇ, ਕੀ ਉਹ ਸਰਕਾਰੀ ਦਖਲਅੰਦਾਜੀ ਨਹੀਂ ਸੀ ? ਸ਼੍ਰੋਮਣੀ ਕਮੇਟੀ ਇਹ ਵੀ ਦੱਸੇ ਕਿ ਪਾਵਨ ਸਰੂਪ ਲਾਪਤਾ ਕਰਨ ਵਾਲੇ ਦੋਸ਼ੀਆਂ 'ਤੇ ਪਰਚਾ ਦਰਜ ਹੋਣਾ ਸ੍ਰੀ ਅਕਾਲ ਤਖ਼ਤ ਸਾਹਿਬ ਵਿੱਚ ਦਖਲਅੰਦਾਜ਼ੀ ਕਿਵੇਂ ਹੋ ਗਈ ? ਜਦੋਂ ਸ੍ਰੀ ਦਰਬਾਰ ਸਾਹਿਬ ਦੇ ਵਿੱਚ ਲਗਾਤਾਰ ਪੁਲਸੀਏ, ਸੀ.ਆਈ.ਡੀ. ਵਾਲੇ ਅਤੇ ਏਜੰਸੀਆਂ ਦੇ ਬੰਦੇ ਤੁਰੇ ਫਿਰਦੇ ਹਨ ਤੇ ਸ਼੍ਰੋਮਣੀ ਕਮੇਟੀ ਰੋਕਦੀ ਨਹੀਂ, ਸਗੋਂ 6 ਜੂਨ 'ਤੇ ਪੁਲਿਸ ਅਤੇ ਸਰਕਾਰ ਨਾਲ ਮਿਲ ਕੇ ਸਾਰੇ ਪ੍ਰਬੰਧ ਕਰਦੀ ਹੈ ਤੇ ਸਿੱਖ ਸੰਗਤਾਂ ਨੂੰ ਰੋਕਦੀ ਹੈ ਕਿ ਉਹ ਸਰਕਾਰੀ ਦਖਲਅੰਦਾਜੀ ਨਹੀਂ ਹੁੰਦੀ ?ਸ਼੍ਰੋਮਣੀ ਕਮੇਟੀ ਅਤੇ ਬਾਦਲ ਦਲੀਓ! ਜਿਹੜੀਆਂ ਸੰਪਰਦਾਵਾਂ ਜਾਂ ਸ਼ਖਸੀਅਤਾਂ ਨੇ ਤੁਹਾਨੂੰ ਪਰਚੇ ਕਰਨ ਤੋਂ ਰੋਕਿਆ ਸੀ, ਉਹਨਾਂ ਦੇ ਵੀ ਨਾਮ ਨਸ਼ਰ ਕਰੋ ਤਾਂ ਜੋ ਸੰਗਤਾਂ ਉਹਨਾਂ ਸੰਪਰਦਾਵਾਂ ਦੇ ਮੁਖੀਆਂ ਤੇ ਸ਼ਖਸੀਅਤਾਂ ਨੂੰ ਵੀ ਧੌਣ ਤੋਂ ਫੜ ਸਕਣ, ਜੋ ਦੋਸ਼ੀਆਂ ਨੂੰ ਬਚਾਉਣਾ ਚਾਹੁੰਦੇ ਹਨ। ਪਰ ਸੰਗਤ ਨੂੰ ਵੀ ਸੱਚ ਪਤਾ ਹੈ ਕਿ ਇਹ ਤਾਂ ਸਿਰਫ਼ ਦੋਸ਼ੀਆਂ ਨੂੰ ਬਚਾਉਣ ਲਈ ਸ਼੍ਰੋਮਣੀ ਕਮੇਟੀ ਨੇ ਇੱਕ ਬਹਾਨਾ ਹੀ ਘੜਿਆ ਹੈ, ਤੇ ਸ੍ਰੀ ਅਕਾਲ ਤਖ਼ਤ ਸਾਹਿਬ ਦੇ ਜਥੇਦਾਰ ਨੂੰ ਵੀ ਵਰਤਿਆ ਗਿਆ ਸੀ ਤੇ ਵਰਤਿਆ ਜਾ ਰਿਹਾ ਹੈ। ਇਸ ਦੇ ਉਲਟ ਸਾਰੀਆਂ ਜਥੇਬੰਦੀਆਂ ਚਾਹੁੰਦੀਆਂ ਹਨ ਕਿ ਦੋਸ਼ੀਆਂ ਨੂੰ ਕਾਨੂੰਨੀ ਸਜ਼ਾ ਵੀ ਮਿਲੇ ਤੇ ਸਾਰਾ ਸੱਚ ਸਾਹਮਣੇ ਆਵੇ। ਸੰਗਤ ਜਾਣਦੀ ਹੈ ਕਿ ਸ਼੍ਰੋਮਣੀ ਕਮੇਟੀ ਬਰਗਾੜੀ, ਬਹਿਬਲ ਅਤੇ ਕੋਟਕਪੂਰਾ ਵਾਂਗ 328 ਪਾਵਨ ਸਰੂਪਾਂ ਦੇ ਮਾਮਲੇ ਵਿੱਚ ਵੀ ਦੋਸ਼ੀਆਂ ਦੀ ਪੁਸ਼ਤਪਨਾਹੀ ਕਰ ਰਹੀ ਹੈ। ਇਸ ਮਾਮਲੇ ਵਿੱਚ ਸ਼੍ਰੋਮਣੀ ਕਮੇਟੀ ਬਾਦਲਕੇ ਬਹੁਤ ਗੰਧਲੀ ਸਿਆਸਤ ਕਰ ਰਹੇ ਹਨ ਜਿਸ ਨਾਲ ਇਹਨਾਂ ਦਾ ਵੱਕਾਰ ਹੋਰ ਰੁਲੇਗਾ। ਜਿਵੇਂ ਬਾਦਲਾਂ ਨੇ ਆਪਣੀ ਸਰਕਾਰ 'ਚ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਜੀ ਦੇ ਅੰਗ ਰੋਲੇ ਸਨ, ਉਸੇ ਤਰ੍ਹਾਂ ਇਹ ਸਾਰੇ ਆਪ ਰੁਲਣਗੇ। 
 

ਰਣਜੀਤ ਸਿੰਘ ਦਮਦਮੀ ਟਕਸਾਲ
(ਪ੍ਰਧਾਨ ਸਿੱਖ ਯੂਥ ਫੈਡਰੇਸ਼ਨ ਭਿੰਡਰਾਂਵਾਲਾ)
ਮੋ : 8872293883.