ਈਟੀਪੀਬੀ ਮੀਟਿੰਗ ’ਚ ਗੁਰਦੁਆਰਾ ਭਾਈ ਜੋਗਾ ਸਿੰਘ ਦੀ ਬਹਾਲੀ ਦੀ ਸਮੀਖਿਆ, ਪੰਜਾ ਸਾਹਿਬ ਨੇੜੇ ਸ਼ਰਧਾਲੂਆਂ ਲਈ ਰਿਹਾਇਸ਼ ਦੀ ਤਜਵੀਜ਼

ਈਟੀਪੀਬੀ ਮੀਟਿੰਗ ’ਚ ਗੁਰਦੁਆਰਾ ਭਾਈ ਜੋਗਾ ਸਿੰਘ ਦੀ ਬਹਾਲੀ ਦੀ ਸਮੀਖਿਆ, ਪੰਜਾ ਸਾਹਿਬ ਨੇੜੇ ਸ਼ਰਧਾਲੂਆਂ ਲਈ ਰਿਹਾਇਸ਼ ਦੀ ਤਜਵੀਜ਼

ਲਾਹੌਰ (ਨਜ਼ਰਾਨਾ ਟਾਈਮਜ਼): ਇਵੈਕਿਊ ਟਰੱਸਟ ਪ੍ਰਾਪਰਟੀ ਬੋਰਡ (ਈਟੀਪੀਬੀ) ਦੀ 359ਵੀਂ ਦੋ ਰੋਜ਼ਾ ਮੀਟਿੰਗ ਦੇ ਆਖ਼ਰੀ ਦਿਨ ਪੇਸ਼ਾਵਰ ਦੇ ਗੁਰਦੁਆਰਾ ਭਾਈ ਜੋਗਾ ਸਿੰਘ ਦੀ ਬਹਾਲੀ ਅਤੇ ਮੁੜ ਉਸਾਰੀ ਦੇ ਪ੍ਰਾਜੈਕਟ ਦੀ ਪ੍ਰਗਤੀ ਦੀ ਸਮੀਖਿਆ ਕੀਤੀ ਗਈ। 101.231 ਮਿਲੀਅਨ ਰੁਪਏ ਦੀ ਲਾਗਤ ਵਾਲੇ ਇਸ ਪ੍ਰਾਜੈਕਟ ਦੇ ਨਾਲ ਹਸਨ ਅਬਦਾਲ ਵਿੱਚ ਗੁਰਦੁਆਰਾ ਪੰਜਾ ਸਾਹਿਬ ਨੇੜੇ ਸਿੱਖ ਸ਼ਰਧਾਲੂਆਂ ਲਈ ਆਧੁਨਿਕ ਰਿਹਾਇਸ਼ੀ ਸਹੂਲਤਾਂ ਬਣਾਉਣ ਦੀ ਤਜਵੀਜ਼ ਵੀ ਪੇਸ਼ ਕੀਤੀ ਗਈ।

ਬੋਰਡ ਦੇ ਚੇਅਰਮੈਨ ਕਮਰ ਜ਼ਮਾਨ ਦੀ ਪ੍ਰਧਾਨਗੀ ਹੇਠ ਹੋਈ ਮੀਟਿੰਗ ਵਿੱਚ ਮੈਂਬਰਾਂ ਨੇ ਏਜੰਡੇ ਦੇ 13 ਅਹਿਮ ਮੁੱਦਿਆਂ ’ਤੇ ਵਿਚਾਰ ਕੀਤਾ। ਬੋਰਡ ਦੇ ਸਕੱਤਰ ਨਾਸਿਰ ਮੁਸ਼ਤਾਕ ਨੇ ਹਿੰਦੂ ਅਤੇ ਸਿੱਖ ਧਾਰਮਿਕ ਜਾਇਦਾਦਾਂ ਦੀ ਬਹਾਲੀ ਤੇ ਮੁਰੰਮਤ, ਘੱਟ ਗਿਣਤੀ ਵਿਦਿਆਰਥੀਆਂ ਦੇ ਵਜ਼ੀਫ਼ਿਆਂ, ਜੀਓ-ਟੈਗਿੰਗ ਅਤੇ ਸੰਸਥਾ ਦੇ ਵਿੱਤੀ ਤੇ ਪ੍ਰਸ਼ਾਸਕੀ ਮਾਮਲੇ ਬੋਰਡ ਅੱਗੇ ਰੱਖੇ।

ਮੀਟਿੰਗ ਵਿੱਚ ਸਾਬਕਾ ਸੂਬਾਈ ਅਸੈਂਬਲੀ ਮੈਂਬਰ ਇਖ਼ਤਿਆਰ ਵਲੀ ਖ਼ਾਨ, ਐਡਵੋਕੇਟ ਅਲੀ ਰਜ਼ਾ, ਸਰਦਾਰ ਤਾਰਾ ਸਿੰਘ, ਡਾ. ਸਵੇਰਾ ਪ੍ਰਕਾਸ਼, ਅਜੈ ਕੁਮਾਰ, ਇਜ਼ਹਾਰੁਲ ਹਸਨ, ਕ੍ਰਿਸ਼ਨ ਸ਼ਰਮਾ, ਬ੍ਰਿਗੇਡੀਅਰ ਖ਼ਾਲਿਦ ਸਿੱਦੀਕ ਰਿਟਾਇਰਡ, ਡਾ. ਮਮਪਾਲ ਸਿੰਘ, ਸਰਦਾਰ ਸੁਰਜੀਤ ਸਿੰਘ ਕੰਵਲ, ਮਨਮੀਤ ਕੌਰ ਮਸ਼ਾਲ, ਸਰਦਾਰ ਇੰਦਰਜੀਤ ਸਿੰਘ, ਮੀਸਾਕ ਆਰਿਫ਼, ਲੈਲਾ ਕਲਪਨਾ ਅਤੇ ਸਤਵੰਤ ਕੌਰ ਸਮੇਤ ਹੋਰ ਬੋਰਡ ਮੈਂਬਰ ਹਾਜ਼ਰ ਸਨ। ਸਬੰਧਤ ਸਰਕਾਰੀ ਵਿਭਾਗਾਂ ਦੇ ਨੁਮਾਇੰਦਿਆਂ ਨੇ ਵੀ ਹਿੱਸਾ ਲਿਆ।

ਟਰੱਸਟ ਜਾਇਦਾਦਾਂ ਦੀ ਜੀਓ-ਟੈਗਿੰਗ ਮੁਕੰਮਲ ਕਰਨ ਲਈ ਸਰਵੇ ਆਫ਼ ਪਾਕਿਸਤਾਨ ਨੂੰ ਦਿੱਤੀ ਮਿਆਦ 31 ਦਸੰਬਰ 2027 ਤੱਕ ਵਧਾਉਣ ਦੀ ਮਨਜ਼ੂਰੀ ਦਿੱਤੀ ਗਈ। ਇਸ ਦੌਰਾਨ 200 ਹਿੰਦੂ ਅਤੇ ਸਿੱਖ ਵਿਦਿਆਰਥੀਆਂ ਨੂੰ ਮਹੀਨਾਵਾਰ ਵਜ਼ੀਫ਼ਿਆਂ ਦੀ ਅਦਾਇਗੀ ਬਾਰੇ ਵੀ ਚਰਚਾ ਹੋਈ।

ਮੀਟਿੰਗ ਦੇ ਏਜੰਡੇ ਵਿੱਚ ਵਿੱਤੀ ਸਾਲ 2025–26 ਅਤੇ 2026–27 ਦੇ ਬਜਟ ਅਨੁਮਾਨਾਂ ਦੀ ਤਸਦੀਕ ਅਤੇ ਫਿਕਸਡ ਡਿਪਾਜ਼ਿਟਾਂ ਤੇ ਮਹੀਨਾਵਾਰ ਕੰਮਕਾਜੀ ਬਕਾਏ ਨੂੰ 350 ਮਿਲੀਅਨ ਰੁਪਏ ਤੋਂ ਵਧਾ ਕੇ 500 ਮਿਲੀਅਨ ਰੁਪਏ ਕਰਨ ਦਾ ਮਾਮਲਾ ਵੀ ਸ਼ਾਮਲ ਸੀ।

ਬੋਰਡ ਦੀਆਂ ਟਰੱਸਟ ਜਾਇਦਾਦਾਂ ਦੀ ਬਿਹਤਰ ਵਰਤੋਂ, ਉਨ੍ਹਾਂ ਨੂੰ ਆਮਦਨ ਦਾ ਸਰੋਤ ਬਣਾਉਣ ਅਤੇ ਵਿਭਾਗੀ ਪੱਧਰ ’ਤੇ ਵੱਖ-ਵੱਖ ਵਿਕਾਸ ਪ੍ਰਾਜੈਕਟ ਤਿਆਰ ਕਰਨ ਦੀਆਂ ਤਜਵੀਜ਼ਾਂ ਵੀ ਏਜੰਡੇ ਦਾ ਹਿੱਸਾ ਸਨ।

ਮੀਟਿੰਗ ਵਿੱਚ ਵਚਨਬੱਧਤਾ ਪ੍ਰਗਟਾਈ ਗਈ ਕਿ ਸੰਸਥਾ ਦੇ ਵਿੱਤੀ ਅਤੇ ਪ੍ਰਸ਼ਾਸਕੀ ਮਾਮਲਿਆਂ ਵਿੱਚ ਸੁਧਾਰ, ਧਾਰਮਿਕ ਵਿਰਾਸਤ ਦੀ ਸੁਰੱਖਿਆ ਅਤੇ ਘੱਟ ਗਿਣਤੀ ਭਾਈਚਾਰਿਆਂ ਦੀ ਭਲਾਈ ਲਈ ਪ੍ਰਭਾਵਸ਼ਾਲੀ ਕਦਮ ਜਾਰੀ ਰੱਖੇ ਜਾਣਗੇ।

News Disclaimer:The news, articles and other materials published by Nazarana Times are based on the opinions of our reporters and writers. The institution is not responsible for the facts and names given in them and the institution does not necessarily agree with them.