ਲਾਹੌਰ , ਨਜ਼ਰਾਨਾ ਟਾਈਮਜ-ਲਾਹੌਰ ਦੇ ਨੌਲੱਖਾ ਪ੍ਰੈਸਬੀਟੇਰੀਅਨ ਚਰਚ ਵਿੱਚ “ਮਾਰਕਾ-ਏ-ਹੱਕ” ਦੇ ਸਬੰਧ ਵਿੱਚ ਯੌਮ-ਏ-ਤਸ਼ੱਕੁਰ ਕਾਨਫਰੰਸ ਦਾ ਆਯੋਜਨ ਕੀਤਾ ਗਿਆ, ਜਿਸ ਵਿੱਚ ਵੱਖ-ਵੱਖ ਮਕਤਬਾ-ਏ-ਫਿਕਰ ਅਤੇ ਧਰਮਾਂ ਨਾਲ ਸਬੰਧਿਤ ਪ੍ਰਮੁੱਖ ਸ਼ਖਸੀਅਤਾਂ ਨੇ ਹਿੱਸਾ ਲਿਆ। ਕਾਨਫਰੰਸ ਵਿੱਚ ਸੂਬਾਈ ਵਜ਼ੀਰ ਬਰਾਇ ਘੱਟ ਸੰਖਿਆਕ ਮਾਮਲੇ ਰਮੇਸ਼ ਸਿੰਘ ਅਰੋੜਾ, ਕੇਂਦਰੀ ਰੂਏਤ-ਏ-ਹਿਲਾਲ ਕਮੇਟੀ ਦੇ ਚੇਅਰਮੈਨ ਅਤੇ ਖਤੀਬ ਬਾਦਸ਼ਾਹੀ ਮਸਜਿਦ ਮੌਲਾਨਾ ਸਈਦ ਅਬਦੁਲ ਖਬੀਰ ਆਜ਼ਾਦ, ਰੈਵਰੈਂਡ ਡਾ. ਮਜੀਦ ਏਬਲ ਅਤੇ ਹੋਰ ਧਾਰਮਿਕ ਤੇ ਸਮਾਜਿਕ ਆਗੂ ਸ਼ਾਮਲ ਹੋਏ।
ਕਾਨਫਰੰਸ ਨੂੰ ਸੰਬੋਧਨ ਕਰਦੇ ਹੋਏ ਰੈਵਰੈਂਡ ਡਾ. ਮਜੀਦ ਏਬਲ ਨੇ ਕਿਹਾ ਕਿ ਭਾਰਤ ਹਮੇਸ਼ਾਂ ਪਾਕਿਸਤਾਨ ਨੂੰ ਨੁਕਸਾਨ ਪਹੁੰਚਾਉਣ ਦੀ ਕੋਸ਼ਿਸ਼ ਕਰਦਾ ਰਿਹਾ ਹੈ ਅਤੇ ਹੁਣ ਉਹ ਵਿਸ਼ਵ ਅਮਨ ਲਈ ਖਤਰਾ ਬਣ ਚੁੱਕਾ ਹੈ। ਉਨ੍ਹਾਂ ਕਿਹਾ ਕਿ ਪਾਕਿਸਤਾਨ ਦੁਨੀਆ ਵਿੱਚ ਅਮਨ ਦਾ ਸਫੀਰ ਬਣ ਕੇ ਉਭਰਿਆ ਹੈ। ਉਨ੍ਹਾਂ ਕਾਨਫਰੰਸ ਦੌਰਾਨ ਇੱਕ ਐਲਾਨੀਆ ਵੀ ਪੇਸ਼ ਕੀਤਾ ਜਿਸਨੂੰ ਸ਼ਿਰਕਤਕਾਰਾਂ ਵੱਲੋਂ ਭਰਪੂਰ ਸਮਰਥਨ ਮਿਲਿਆ।
ਸੂਬਾਈ ਵਜ਼ੀਰ ਰਮੇਸ਼ ਸਿੰਘ ਅਰੋੜਾ ਨੇ ਮਾਰਕਾ-ਏ-ਹੱਕ ਦੀ ਕਾਮਯਾਬੀ ‘ਤੇ ਪੂਰੀ ਕੌਮ ਨੂੰ ਮੁਬਾਰਕਬਾਦ ਦਿੰਦਿਆਂ ਕਿਹਾ ਕਿ ਪਿਛਲੇ ਸਾਲ ਦੁਸ਼ਮਣ ਨੇ ਪਾਕਿਸਤਾਨ ਖ਼ਿਲਾਫ਼ ਸਾਜ਼ਿਸ਼ ਕਰਕੇ ਬੇਗੁਨਾਹ ਨਾਗਰਿਕਾਂ ਅਤੇ ਨਾ-ਹਥਿਆਰਬੰਦ ਲੋਕਾਂ ਨੂੰ ਨਿਸ਼ਾਨਾ ਬਣਾਇਆ ਸੀ। ਉਨ੍ਹਾਂ ਕਿਹਾ ਕਿ ਸਿੱਖਾਂ, ਮੁਸਲਮਾਨਾਂ, ਇਸਾਈਆਂ, ਹਿੰਦੂਆਂ ਅਤੇ ਹੋਰ ਘੱਟ ਸੰਖਿਆਕ ਭਾਈਚਾਰਿਆਂ ਸਮੇਤ ਕੋਈ ਵੀ ਉਸ ਦੇਸ਼ ਵਿੱਚ ਸੁਰੱਖਿਅਤ ਨਹੀਂ ਜੋ ਆਪਣੇ ਆਪ ਨੂੰ ਸੈਕੂਲਰ ਰਾਜ ਕਹਿੰਦਾ ਹੈ। ਰਮੇਸ਼ ਸਿੰਘ ਅਰੋੜਾ ਨੇ ਕਿਹਾ ਕਿ ਸਿੱਖ ਭਾਈਚਾਰਾ 6 ਜੂਨ ਨੂੰ ਸ੍ਰੀ ਹਰਿਮੰਦਰ ਸਾਹਿਬ ‘ਤੇ ਹਮਲੇ ਦੀ ਯਾਦ ਵਿੱਚ ਕਾਲੇ ਦਿਨ ਵਜੋਂ ਮਨਾਉਂਦਾ ਹੈ। ਉਨ੍ਹਾਂ ਜ਼ੋਰ ਦੇ ਕੇ ਕਿਹਾ ਕਿ ਪਾਕਿਸਤਾਨ ਵਿੱਚ ਸਾਰੇ ਧਰਮ ਅਤੇ ਘੱਟ ਸੰਖਿਆਕ ਭਾਈਚਾਰੇ ਇਕੱਠੇ ਹੋ ਕੇ ਇਹ ਸੰਦੇਸ਼ ਦੇ ਰਹੇ ਹਨ ਕਿ ਪਾਕਿਸਤਾਨ ਅਮਨ, ਪਿਆਰ ਅਤੇ ਭਾਈਚਾਰੇ ਦੀ ਧਰਤੀ ਹੈ। ਉਨ੍ਹਾਂ ਕਿਹਾ ਕਿ ਜਿੱਥੇ ਦੁਸ਼ਮਣ ਵਿੱਚ ਦੇਸ਼ਭਗਤੀ ਦੀ ਭਾਵਨਾ ਨਹੀਂ, ਉੱਥੇ ਪਾਕਿਸਤਾਨੀ ਕੌਮ ਇਕਜੁੱਟੀ, ਇਮਾਨ ਅਤੇ ਕੌਮੀ ਗ਼ੁਰੂਰ ਨਾਲ ਭਰੀ ਹੋਈ ਹੈ।
ਮਸ਼ਹੂਰ ਧਾਰਮਿਕ ਵਿਦਵਾਨ ਮੌਲਾਨਾ ਆਸਿਮ ਮਖਦੂਮ ਨੇ ਡਾ. ਮਜੀਦ ਏਬਲ ਵੱਲੋਂ ਪੇਸ਼ ਕੀਤੇ ਗਏ ਐਲਾਨੀਏ ਦੀ ਪੂਰੀ ਹਿਮਾਇਤ ਕਰਦਿਆਂ ਕਿਹਾ ਕਿ ਭਾਰਤ ਦੁਨੀਆ ਭਰ ਵਿੱਚ ਕਈ ਵੱਡੀਆਂ ਘਟਨਾਵਾਂ ਵਿੱਚ ਸ਼ਾਮਲ ਰਿਹਾ ਹੈ।
ਚੇਅਰਮੈਨ ਕੇਂਦਰੀ ਰੂਏਤ-ਏ-ਹਿਲਾਲ ਕਮੇਟੀ ਮੌਲਾਨਾ ਸਈਦ ਅਬਦੁਲ ਖਬੀਰ ਆਜ਼ਾਦ ਨੇ ਆਪਣੇ ਖ਼ਿਤਾਬ ਵਿੱਚ ਕਿਹਾ ਕਿ “ਬੁਨਿਆਨ-ਉਨ-ਮਰਸੂਸ” ਮਾਰਕਾ-ਏ-ਹੱਕ ਦੀ ਕਾਮਯਾਬੀ ‘ਤੇ ਯੌਮ-ਏ-ਤਸ਼ੱਕੁਰ ਦੀਆਂ ਤਕਰੀਬਾਂ ਪੂਰੇ ਦੇਸ਼ ਵਿੱਚ ਮਨਾਈਆਂ ਜਾ ਰਹੀਆਂ ਹਨ ਅਤੇ ਕੋਈ ਐਸੀ ਥਾਂ ਨਹੀਂ ਜਿੱਥੇ ਇਹ ਜਸ਼ਨ ਨਾ ਹੋ ਰਹੇ ਹੋਣ। ਉਨ੍ਹਾਂ ਕਿਹਾ ਕਿ ਭਾਰਤ ਇੱਕ ਧੋਖੇਬਾਜ਼ ਅਤੇ ਬੇਈਮਾਨ ਰਾਜ ਹੈ ਜਿਸਨੇ ਬੇਬੁਨਿਆਦ ਇਲਜ਼ਾਮਾਂ ਦੇ ਆਧਾਰ ‘ਤੇ ਪਾਕਿਸਤਾਨ ਖ਼ਿਲਾਫ਼ ਜ਼ਬਰਦਸਤੀ ਕਰਨ ਦੀ ਕੋਸ਼ਿਸ਼ ਕੀਤੀ, ਪਰ ਫੀਲਡ ਮਾਰਸ਼ਲ ਦੀ ਕਿਆਦਤ ਹੇਠ ਦੁਸ਼ਮਣ ਨੂੰ ਕਰਾਰਾ ਜਵਾਬ ਦਿੱਤਾ ਗਿਆ।
ਹੋਰ ਮੁਕਰਰਿਨ ਨੇ ਵੀ ਪਾਕਿਸਤਾਨੀ ਫੌਜ ਨੂੰ ਖ਼ਿਰਾਜ਼-ਏ-ਤਹਸੀਨ ਪੇਸ਼ ਕੀਤਾ ਅਤੇ ਦੇਸ਼ ਦੀ ਰੱਖਿਆ ਅਤੇ ਸੁਰੱਖਿਆ ਲਈ ਆਪਣੇ ਖੂਨ ਦੀ ਆਖ਼ਰੀ ਬੂੰਦ ਤੱਕ ਕੁਰਬਾਨੀ ਦੇਣ ਦੇ ਅਜ਼ਮ ਦਾ ਇਜ਼ਹਾਰ ਕੀਤਾ।