ਕਪੂਰਥਲਾ, 3 ਨਵੰਬਰ 2026:ਗੌਰਵ ਮੜੀਆ 

ਰੇਲ ਕੋਚ ਫੈਕਟਰੀ (RCF), ਕਪੂਰਥਲਾ ਦੇ ਸਾਹਿਬਜ਼ਾਦਾ ਅਜੀਤ ਸਿੰਘ ਇੰਸਟੀਚਿਊਟ (ਵਰਕਰ ਕਲੱਬ) ਵੱਲੋਂ ਆਯੋਜਿਤ ਤਿੰਨ ਰੋਜ਼ਾ '32ਵੇਂ ਸਭਿਆਚਾਰਕ ਦੀਵਾਲੀ ਮੇਲਾ-2026' ਦਾ ਦੂਜਾ ਦਿਨ ਅੱਜ ਬੇਹੱਦ ਉਤਸ਼ਾਹ ਅਤੇ ਸਭਿਆਚਾਰਕ ਰੰਗਤ ਨਾਲ ਸੰਪੰਨ ਹੋਇਆ।

ਅੱਜ ਦੀ ਵਿਸ਼ੇਸ਼ 'ਕਲਚਰਲ ਈਵਨਿੰਗ' ਦੇ ਸਫ਼ਲ ਆਯੋਜਨ ਸਬੰਧੀ ਜਾਣਕਾਰੀ ਦਿੰਦਿਆਂ ਵਰਕਰ ਕਲੱਬ ਦੇ ਮਾਨਯੋਗ ਸਕੱਤਰ ਸ੍ਰੀ ਭਰਤ ਰਾਜ ਨੇ ਦੱਸਿਆ ਕਿ, “ਅੱਜ 3 ਨਵੰਬਰ ਦੀ ਸ਼ਾਮ ਵਰਕਰ ਕਲੱਬ ਦੇ ਵਿਹੜੇ ਵਿੱਚ ਆਯੋਜਿਤ 'ਹਰਵਿੰਦਰ ਸੰਧੂ ਨਾਈਟ' ਬੇਹੱਦ ਯਾਦਗਾਰ ਰਹੀ। ਸ਼ਾਮ 7:00 ਵਜੇ ਸ਼ੁਰੂ ਹੋਏ ਇਸ ਪ੍ਰੋਗਰਾਮ ਵਿੱਚ ਪ੍ਰਸਿੱਧ ਗਾਇਕ ਹਰਵਿੰਦਰ ਸੰਧੂ (Harinder Sandhu) ਨੇ ਆਪਣੀ ਲਾਈਵ ਪੇਸ਼ਕਾਰੀ ਰਾਹੀਂ ਦਰਸ਼ਕਾਂ ਨੂੰ ਝੂਮਣ ਲਈ ਮਜਬੂਰ ਕਰ ਦਿੱਤਾ। ਉਨ੍ਹਾਂ ਵੱਲੋਂ ਪੇਸ਼ ਕੀਤੇ ਗਏ ਪੰਜਾਬੀ ਲੋਕ ਗੀਤਾਂ ਅਤੇ ਸਭਿਆਚਾਰਕ ਧੁਨਾਂ ਨੇ ਆਰਸੀਐੱਫ ਪਰਿਵਾਰ ਅਤੇ ਹਾਜ਼ਰ ਜਨ ਸਮੂਹ ਦਾ ਮਨ ਮੋਹ ਲਿਆ। ਇਸ ਦੇ ਨਾਲ ਹੀ ਪਰਿਵਾਰਕ ਮਨੋਰੰਜਨ ਅਤੇ ਪੰਜਾਬੀ ਲੋਕ ਸੱਭਿਆਚਾਰ ਦੀਆਂ ਹੋਰ ਸ਼ਾਨਦਾਰ ਪੇਸ਼ਕਾਰੀਆਂ ਵੀ ਖਿੱਚ ਦਾ ਕੇਂਦਰ ਰਹੀਆਂ।”

ਮਾਨਯੋਗ ਸਕੱਤਰ ਸ੍ਰੀ ਭਰਤ ਰਾਜ ਨੇ ਮੀਡੀਆ ਦੇ ਸਾਥੀਆਂ ਅਤੇ ਦਰਸ਼ਕਾਂ ਦਾ ਧੰਨਵਾਦ ਕਰਦਿਆਂ ਕਿਹਾ ਕਿ, "ਅੱਜ ਲਗਾਤਾਰ ਦੂਜੇ ਦਿਨ ਇੰਨੀ ਵੱਡੀ ਗਿਣਤੀ ਵਿੱਚ ਪਹੁੰਚ ਕੇ ਪ੍ਰੋਗਰਾਮ ਦੀ ਰੌਣਕ ਵਧਾਉਣ ਲਈ ਮੈਂ ਸਮੂਹ ਆਰਸੀਐੱਫ ਨਿਵਾਸੀਆਂ ਅਤੇ ਹਾਜ਼ਰ ਦਰਸ਼ਕਾਂ ਦਾ ਤਹਿ ਦਿਲੋਂ ਧੰਨਵਾਦ ਕਰਦਾ ਹਾਂ। ਕੱਲ੍ਹ, ਯਾਨੀ 4 ਨਵੰਬਰ (ਬੁੱਧਵਾਰ) ਨੂੰ ਮੇਲੇ ਦਾ ਆਖਰੀ ਅਤੇ ਸਮਾਪਤੀ ਦਿਵਸ ਹੈ। ਕੱਲ੍ਹ ਸ਼ਾਮ 'ਮੁੰਡੇ ਰੁੜਕੇ ਵਾਲੇ' ਗਰੁੱਪ (Munde Rurke Wale) ਵੱਲੋਂ ਧਮਾਕੇਦਾਰ ਭੰਗੜੇ ਅਤੇ ਰੰਗਾਰੰਗ ਸਭਿਆਚਾਰਕ ਪ੍ਰੋਗਰਾਮ ਦਾ ਆਯੋਜਨ ਕੀਤਾ ਜਾਵੇਗਾ। ਆਪ ਸਭ ਨੂੰ ਨਿਮਰਤਾ ਸਹਿਤ ਬੇਨਤੀ ਹੈ ਕਿ ਕੱਲ੍ਹ ਸ਼ਾਮ 7:00 ਵਜੇ ਵਰਕਰ ਕਲੱਬ ਦੇ ਵਿਹੜੇ ਵਿੱਚ ਪਹੁੰਚ ਕੇ ਇਸ ਤਿੰਨ ਰੋਜ਼ਾ ਉਤਸਵ ਦੇ ਸ਼ਾਨਦਾਰ ਸਮਾਪਤੀ ਸਮਾਰੋਹ ਦਾ ਹਿੱਸਾ ਬਣੋ।"