ਰਿਹਾਇਸ਼ੀ ਮਕਾਨ ’ਚ ਚੱਲ ਰਹੇ ਤੇਲ ਦੇ ਗੋਦਾਮ ’ਤੇ ਛਾਪਾ; ਸੈਂਪਲ ਲੈਬ ਜਾਂਚ ਲਈ ਭੇਜੇ, ਰਿਪੋਰਟ ਤੋਂ ਬਾਅਦ ਹੋਵੇਗੀ ਅਗਲੀ ਕਾਰਵਾਈ

ਬਰਨਾਲਾ (ਨਜ਼ਰਾਨਾ ਟਾਈਮਜ਼): ਤਿਉਹਾਰਾਂ ਦੇ ਸੀਜ਼ਨ ਦੌਰਾਨ ਖਾਣ-ਪੀਣ ਵਾਲੀਆਂ ਵਸਤਾਂ ਵਿੱਚ ਮਿਲਾਵਟ ਖ਼ਿਲਾਫ਼ ਚਲਾਈ ਜਾ ਰਹੀ ਮੁਹਿੰਮ ਤਹਿਤ ਫੂਡ ਸੇਫਟੀ ਵਿਭਾਗ ਨੇ ਬਰਨਾਲਾ ਵਿੱਚ ਵੱਡੀ ਕਾਰਵਾਈ ਕੀਤੀ ਹੈ। ਵਿਭਾਗ ਦੀ ਟੀਮ ਨੇ ਦਾਣਾ ਮੰਡੀ ਰੋਡ ’ਤੇ ਪ੍ਰੇਮ ਅੱਖਾਂ ਦੇ ਹਸਪਤਾਲ ਨੇੜੇ ਇੱਕ ਰਿਹਾਇਸ਼ੀ ਮਕਾਨ ਵਿੱਚ ਬਣਾਏ ਗਏ ਗੋਦਾਮ ’ਤੇ ਛਾਪਾ ਮਾਰ ਕੇ ਕਰੀਬ 1100 ਲੀਟਰ ਸ਼ੱਕੀ ਤੇਲ ਅਤੇ ਹੋਰ ਸਮੱਗਰੀ ਕਬਜ਼ੇ ਵਿੱਚ ਲੈ ਕੇ ਸਟਾਕ ਸੀਲ ਕਰ ਦਿੱਤਾ। 

ਰਿਪੋਰਟਾਂ ਮੁਤਾਬਕ ਇਹ ਕਾਰਵਾਈ ਫੂਡ ਸੇਫਟੀ ਅਫ਼ਸਰ ਚਰਨਜੀਤ ਸਿੰਘ ਦੀ ਅਗਵਾਈ ਹੇਠ ਗੁਪਤ ਸੂਚਨਾ ਦੇ ਆਧਾਰ ’ਤੇ ਕੀਤੀ ਗਈ। ਮੌਕੇ ’ਤੇ ਵੱਡੀਆਂ ਟੈਂਕੀਆਂ ਵਿੱਚ ਵੱਖ-ਵੱਖ ਕਿਸਮ ਦਾ ਤੇਲ ਰੱਖਿਆ ਹੋਇਆ ਮਿਲਿਆ। ਇੱਕ ਰਿਪੋਰਟ ਮੁਤਾਬਕ ਲਗਭਗ 600 ਲੀਟਰ ਸਰ੍ਹੋਂ ਦਾ ਤੇਲ, 375 ਲੀਟਰ ਸ਼ੱਕੀ ਸਮੱਗਰੀ ਅਤੇ ਤੇਲ ਨਾਲ ਭਰੀਆਂ ਕਰੀਬ 150 ਬੋਤਲਾਂ ਬਰਾਮਦ ਹੋਈਆਂ। 
ਜਾਂਚ ਦੌਰਾਨ ਇਹ ਗੱਲ ਵੀ ਸਾਹਮਣੇ ਆਈ ਕਿ ਕਾਰੋਬਾਰ ਲਈ ਦਰਸਾਏ ਗਏ ਲਾਇਸੈਂਸ ਦਾ ਪਤਾ ਅਤੇ ਮੌਜੂਦਾ ਗੋਦਾਮ ਦਾ ਟਿਕਾਣਾ ਵੱਖ-ਵੱਖ ਦੱਸਿਆ ਜਾ ਰਿਹਾ ਹੈ। ਇਸ ਪਹਿਲੂ ਦੀ ਵੀ ਵਿਭਾਗ ਵੱਲੋਂ ਜਾਂਚ ਕੀਤੀ ਜਾ ਰਹੀ ਹੈ। 
ਵਿਭਾਗ ਨੇ ਮੌਕੇ ਤੋਂ ਸੈਂਪਲ ਲੈ ਕੇ ਲੈਬ ਜਾਂਚ ਲਈ ਭੇਜ ਦਿੱਤੇ ਹਨ। ਅਧਿਕਾਰੀਆਂ ਅਨੁਸਾਰ ਲੈਬ ਰਿਪੋਰਟ ਆਉਣ ਤੋਂ ਬਾਅਦ ਹੀ ਇਹ ਪੱਕੇ ਤੌਰ ’ਤੇ ਸਪੱਸ਼ਟ ਹੋਵੇਗਾ ਕਿ ਤੇਲ ਖੁਰਾਕ ਸੁਰੱਖਿਆ ਮਾਪਦੰਡਾਂ ’ਤੇ ਖਰਾ ਉਤਰਦਾ ਹੈ ਜਾਂ ਨਹੀਂ। ਰਿਪੋਰਟ ਵਿੱਚ ਗੜਬੜ ਸਾਹਮਣੇ ਆਉਣ ’ਤੇ ਫੂਡ ਸੇਫਟੀ ਕਾਨੂੰਨ ਤਹਿਤ ਅਗਲੀ ਕਾਰਵਾਈ ਕੀਤੀ ਜਾਵੇਗੀ।