ਪਾਕਿਸਤਾਨ ਵਿੱਚ ਸਥਾਨਕ ਸਰਕਾਰ ਦੀਆਂ ਚੋਣਾਂ 15 ਫ਼ਰਵਰੀ 2026 ਨੂੰ ਹੋਣਗੀਆਂ

ਲਾਹੌਰ (ਖ਼ਾਸ ਰਿਪੋਰਟਰ)
 

ਪਾਕਿਸਤਾਨ ਚੋਣ ਕਮਿਸ਼ਨ ਨੇ ਸਥਾਨਕ ਸਰਕਾਰ (ਐਲ.ਜੀ.) ਚੋਣਾਂ ਲਈ ਪੂਰਾ ਸ਼ਡਿਊਲ ਜਾਰੀ ਕਰ ਦਿੱਤਾ ਹੈ, ਜਿਸ ਨਾਲ ਚੋਣੀ ਮੈਦਾਨ ਦੀ ਪਹਿਲੀ ਘੰਟੀ ਵੱਜ ਚੁੱਕੀ ਹੈ। ਜਾਰੀ ਕੀਤੇ ਐਲਾਨ ਮੁਤਾਬਕ ਦੇਸ਼ ਭਰ ਦੇ ਵੋਟਰ 15 ਫ਼ਰਵਰੀ 2026 ਨੂੰ ਆਪਣੇ ਨੁਮਾਇੰਦਿਆਂ ਦੀ ਚੋਣ ਕਰਨ ਲਈ ਵੋਟ ਪਾਉਣਗੇ। ਨਾਮਜ਼ਦਗੀ ਪੱਤਰਾਂ ਦੀ ਪ੍ਰਕਿਰਿਆ 22 ਦਸੰਬਰ 2025 ਤੋਂ ਸ਼ੁਰੂ ਹੋਵੇਗੀ।
ਚੋਣ ਸੰਬੰਧੀ ਸਾਰੀਆਂ ਸਰਕਾਰੀ ਕਾਰਵਾਈਆਂ ਦੀ ਸ਼ੁਰੂਆਤ 19 ਦਸੰਬਰ 2025 ਨੂੰ ਜਨਤਕ ਨੋਟਿਸ ਅਤੇ ਨਾਮਜ਼ਦਗੀ ਫਾਰਮ ਜਾਰੀ ਕਰਨ ਨਾਲ ਹੋਵੇਗੀ, ਜਦਕਿ ਸਾਰੀਆਂ ਤਿਆਰੀਆਂ 16 ਜਨਵਰੀ 2026 ਤੱਕ ਪੂਰੀਆਂ ਕੀਤੀਆਂ ਜਾਣਗੀਆਂ।
ਚੋਣ ਕਮਿਸ਼ਨ ਨੇ ਸਾਰੀਆਂ ਸਿਆਸੀ ਪਾਰਟੀਆਂ ਅਤੇ ਆਜ਼ਾਦ ਉਮੀਦਵਾਰਾਂ ਨੂੰ ਨਿਰਧਾਰਤ ਸਮਾਂ-ਸਾਰਣੀ ਦੀ ਪਾਲਣਾ ਕਰਨ ਅਤੇ ਆਪਣੀਆਂ ਤਿਆਰੀਆਂ ਸਮੇਂ ਸਿਰ ਮੁਕੰਮਲ ਕਰਨ ਲਈ ਕਿਹਾ ਹੈ।

📅 ਪੂਰਾ ਚੋਣ ਸ਼ਡਿਊਲ

• ਜਨਤਕ ਨੋਟਿਸ ਅਤੇ ਨਾਮਜ਼ਦਗੀ ਫਾਰਮ ਜਾਰੀ: 19 ਦਸੰਬਰ 2025
• ਨਾਮਜ਼ਦਗੀ ਪੱਤਰ ਜਮ੍ਹਾਂ ਕਰਵਾਉਣਾ: 22–27 ਦਸੰਬਰ 2025
• ਨਾਮਜ਼ਦਗੀ ਪੱਤਰਾਂ ਦੀ ਜਾਂਚ: 30 ਦਸੰਬਰ 2025 – 3 ਜਨਵਰੀ 2026
• ਅਪੀਲਾਂ ਦਰਜ ਕਰਨ ਦੀ ਮਿਆਦ: 5–8 ਜਨਵਰੀ 2026
• ਅਪੀਲਾਂ ’ਤੇ ਫ਼ੈਸਲੇ: 9–13 ਜਨਵਰੀ 2026
• ਉਮੀਦਵਾਰੀ ਵਾਪਸ ਲੈਣ ਦੀ ਆਖ਼ਰੀ ਮਿਤੀ: 15 ਜਨਵਰੀ 2026
• ਉਮੀਦਵਾਰਾਂ ਦੀ ਫਾਈਨਲ ਲਿਸਟ ਅਤੇ ਚੋਣ ਨਿਸ਼ਾਨ: 16 ਜਨਵਰੀ 2026
• ਚੋਣ ਦਿਵਸ: 15 ਫ਼ਰਵਰੀ 2026 (ਸਵੇਰੇ 8:00 ਵਜੇ ਤੋਂ ਸ਼ਾਮ 4:00 ਵਜੇ ਤੱਕ)
• ਨਤੀਜਿਆਂ ਦੀ ਤਿਆਰੀ: 16–19 ਫ਼ਰਵਰੀ 2026
ਇਹ ਵੀ ਜ਼ਿਕਰਯੋਗ ਹੈ ਕਿ ਸਰਕਾਰ ਵੱਲੋਂ ਲਗਾਤਾਰ ਦਬਾਅ ਦੇ ਬਾਅਦ ਚੋਣ ਕਮਿਸ਼ਨ ਨੇ ਇਹ ਮਿਤੀਆਂ ਫਾਇਨਲ ਕੀਤੀਆਂ ਹਨ। ਸਿਆਸੀ ਵਿਸ਼ਲੇਸ਼ਕਾਂ ਦਾ ਮੰਨਣਾ ਹੈ ਕਿ ਹੁਣ ਜਦੋਂ ਪੂਰਾ ਸ਼ਡਿਊਲ ਜਾਰੀ ਹੋ ਗਿਆ ਹੈ, ਸਾਰੀਆਂ ਪਾਰਟੀਆਂ ਆਪਣੀਆਂ ਤਿਆਰੀਆਂ ਪੂਰੀ ਕਰਕੇ ਚੋਣੀ ਮੈਦਾਨ ਵਿੱਚ ਉਤਰਣ ਲਈ ਤਿਆਰ ਹਨ।

ਰਿਪੋਰਟ: ਅਲੀ ਇਮਰਾਨ ਛਠਾ
ਨਜ਼ਰਾਨਾ ਟਾਈਮਜ਼, ਲਾਹੌਰ