ਕਲਤੂਰਾ ਸਿੱਖ ਸੰਸਥਾ ਵੱਲੋਂ ਗੁਰ ਮਰਿਆਦਾ ਦੀ ਬਹਾਲੀ ਲਈ ਵਿਲੱਖਣ ਉਪਰਾਲਾ
ਰੋਮ ਇਟਲੀ 12 ਮਾਰਚ ,ਰਾਜਿੰਦਰ ਸਿੰਘ ਪਟਿਆਲਾ
ਇਟਲੀ ਦੀ ਪ੍ਰਸਿੱਧ ਸਿੱਖ ਸੰਸਥਾ ‘ਕਲਤੂਰਾ ਸਿੱਖ’ ਵੱਲੋਂ 2025 ਦੇ ਪਹਿਲੇ ਨਗਰ ਕੀਰਤਨ ਵਿੱਚ ਲੰਗਰ ਸਿਰਫ਼ ਪੰਗਤ ਵਿੱਚ ਛਕਾਉਣ ਦੀ ਗੁਰ ਮਰਿਆਦਾ ਨੂੰ ਬਹਾਲ ਕਰਨ ਲਈ ਵਿਲੱਖਣ ਉਪਰਾਲਾ ਕੀਤਾ ਜਾ ਰਿਹਾ ਹੈ।
ਨਵੇਂ ਨਾਨਕਸ਼ਾਹੀ ਸੰਮਤ 557 ਦੀ ਸ਼ੁਰੂਆਤ ਦੇ ਨਾਲ, ਇਹ ਸੰਸਥਾ ਗੁਰੂ ਸਾਹਿਬ ਵੱਲੋਂ ਨਿਰਧਾਰਤ ਗੁਰ ਮਰਿਆਦਾ ‘ਪਹਿਲੇ ਪੰਗਤ, ਪਾਛੇ ਸੰਗਤ’ ਦੇ ਅਨੁਸਾਰ ਲੰਗਰ ਵਿਵਸਥਾ ਲਾਗੂ ਕਰਨ ਦੀ ਕੋਸ਼ਿਸ਼ ਕਰ ਰਹੀ ਹੈ। ਇਟਲੀ ਦੇ ਪਹਿਲੇ ਨਗਰ ਕੀਰਤਨ ਦੌਰਾਨ, ਲੰਗਰ ਕੇਵਲ ਪੰਗਤ ਵਿੱਚ ਛਕਾਉਣ ਦੀ ਪਹੁੰਚ ਨੂੰ ਆਗੇ ਵਧਾਇਆ ਜਾਵੇਗਾ, ਜਿਸ ਦੀ ਸੰਸਥਾ ਵੱਲੋਂ ਸਮੂਹ ਗੁਰਦੁਆਰਾ ਪ੍ਰਬੰਧਕ ਕਮੇਟੀਆਂ ਅਤੇ ਸੰਗਤਾਂ ਨੂੰ ਅਪੀਲ ਕੀਤੀ ਗਈ ਹੈ।
ਸੰਗਤਾਂ ਨੂੰ ਆਗਾਹ ਕਰਦੇ ਹੋਏ, ਸੰਸਥਾ ਨੇ ਕਿਹਾ ਕਿ ਆਓ ਮਿਲ ਕੇ ਗੁਰ ਮਰਿਆਦਾ ਨੂੰ ਦੁਬਾਰਾ ਸਥਾਪਿਤ ਕਰੀਏ, ਤਾਂ ਜੋ ਹਰ ਗੁਰਦੁਆਰਾ ਸਾਹਿਬ ਅਤੇ ਧਾਰਮਿਕ ਸਮਾਗਮ ਵਿੱਚ ਲੰਗਰ ਕੇਵਲ ਪੰਗਤ ਵਿੱਚ ਹੀ ਛਕਾਇਆ ਜਾਵੇ। ਇਹ ਉਪਰਾਲਾ ਇਸ ਗੱਲ ਨੂੰ ਯਕੀਨੀ ਬਣਾਉਣ ਲਈ ਹੈ ਕਿ ਗੁਰੂ ਸਾਹਿਬ ਦੀਆਂ ਖੁਸ਼ੀਆਂ ਅਤੇ ਗੁਰਮਤਿ ਪ੍ਰੰਪਰਾਵਾਂ ਨੂੰ ਪੂਰੀ ਇਜ਼ਤ ਮਿਲੇ।
ਇਟਲੀ ਵਿੱਚ ਨਗਰ ਕੀਰਤਨਾਂ ਦੌਰਾਨ ਲੰਗਰ ਦੀ ਬੇਅਦਬੀ ਇੱਕ ਗੰਭੀਰ ਮੁੱਦਾ:
ਇਟਲੀ ਵਿੱਚ ਹੋਣ ਵਾਲੇ ਕੁਝ ਨਗਰ ਕੀਰਤਨਾਂ ਦੌਰਾਨ, ਅਣਜਾਣੇ ਤੌਰ ‘ਤੇ, ਸੰਗਤਾਂ ਵੱਲੋਂ ਲੰਗਰ ਦੀ ਗੁਰ ਮਰਿਆਦਾ ਦੀ ਉਲੰਘਣਾ ਹੋ ਜਾਂਦੀ ਹੈ। ਪ੍ਰਬੰਧਕ ਵੀ ਇਸ ਗੱਲ ਨੂੰ ਮਹਿਸੂਸ ਕਰਦੇ ਹਨ ਕਿ ਕਈ ਵਾਰ ਲੰਗਰ ਪੰਗਤ ਵਿੱਚ ਬੈਠਣ ਦੀ ਥਾਂ ਉਤੇ ਖੜ੍ਹ ਕੇ ਜਾਂ ਗੱਲਾਂ ਕਰਦੇ ਹੋਏ ਛਕਾਇਆ ਜਾਂਦਾ ਹੈ, ਜੋ ਕਿ ਗੁਰ ਮਰਿਆਦਾ ਅਨੁਸਾਰ ਨਹੀਂ।
ਇਸ ਬੇਅਦਬੀ ਨੂੰ ਰੋਕਣ ਲਈ, ਕਲਤੂਰਾ ਸਿੱਖ ਸੰਸਥਾ ਵੱਲੋਂ 16 ਮਾਰਚ ਨੂੰ ਗੁਰਦੁਆਰਾ ਸਾਹਿਬ ਹਰਗੋਬਿੰਦ ਸਾਹਿਬ, ਲੇਨੋ (ਬਰੇਸ਼ੀਆ) ਵਿਖੇ ਵਿਲੱਖਣ ਉਪਰਾਲਾ ਕੀਤਾ ਜਾ ਰਿਹਾ ਹੈ। ਇਸ ਗੱਲ ਦੀ ਭਵਿੱਖ ਵਿੱਚ ਹੋਰ ਨਗਰ ਕੀਰਤਨਾਂ ‘ਚ ਲਾਗੂ ਹੋਣ ਦੀ ਸੰਭਾਵਨਾ ਆਉਣ ਵਾਲਾ ਸਮਾਂ ਹੀ ਤੈਅ ਕਰੇਗਾ, ਕਿਉਂਕਿ ਇਟਲੀ ਦੇ ਵੱਡੇ ਨਗਰ ਕੀਰਤਨਾਂ ਵਿੱਚ ਹਜ਼ਾਰਾਂ ਦੀ ਗਿਣਤੀ ਵਿੱਚ ਸੰਗਤ ਹਾਜ਼ਰ ਹੁੰਦੀ ਹੈ, ਜਿਸ ਨਾਲ ਪੂਰੀ ਤਰੀਕੇ ਨਾਲ ਪੰਗਤ ਲੰਗਰ ਵਿਵਸਥਾ ਬਣਾਉਣਾ ਚੁਣੌਤੀਪੂਰਨ ਹੋ ਸਕਦਾ ਹੈ।
ਸਾਬਕਾ ਜਥੇਦਾਰ ਗਿਆਨੀ ਹਰਪ੍ਰੀਤ ਸਿੰਘ ਵੱਲੋਂ ਉਪਰਾਲੇ ਦੀ ਤਾਰੀਫ਼:
ਅਕਾਲ ਤਖ਼ਤ ਦੇ ਸਾਬਕਾ ਜਥੇਦਾਰ ਗਿਆਨੀ ਹਰਪ੍ਰੀਤ ਸਿੰਘ ਨੇ ਵੀ ਇਟਲੀ ‘ਚ ਹੋਣ ਵਾਲੇ ਇਸ ਨਵੇਂ ਉਪਰਾਲੇ ਦੀ ਸ਼ਲਾਘਾ ਕੀਤੀ ਹੈ, ਜਿਸ ਵਿੱਚ ਪੂਰੀ ਗੁਰ ਮਰਿਆਦਾ ਅਨੁਸਾਰ ਲੰਗਰ ਛਕਾਉਣ ‘ਤੇ ਜ਼ੋਰ ਦਿੱਤਾ ਜਾ ਰਿਹਾ ਹੈ।
Posted By: GURBHEJ SINGH ANANDPURI