ਥੀਨ ਡੈਮ ਦੇ ਗੇਟ ਖੁੱਲ੍ਹੇ, ਪੰਜਾਬ ਦੇ 6 ਜ਼ਿਲ੍ਹਿਆਂ ’ਚ ਬਾੜ੍ਹ ਦਾ ਖਤਰਾ – ਫੌਜ ਤਾਇਨਾਤ

ਲਾਹੌਰ, 27 ਅਗਸਤ (ਅਲੀ ਇਮਰਾਨ ਚੱਠਾ):

ਭਾਰਤ ਵੱਲੋਂ ਰਾਵੀ ਦਰਿਆ ਉੱਤੇ ਸਥਿਤ ਥੀਨ ਡੈਮ ਦੇ ਸਾਰੇ ਗੇਟ ਖੋਲ੍ਹਣ ਨਾਲ ਪੰਜਾਬ ਵਿੱਚ ਬਾੜ੍ਹ ਦਾ ਖਤਰਾ ਵੱਧ ਗਿਆ ਹੈ। ਪੰਜਾਬ ਸਰਕਾਰ ਨੇ ਲਾਹੌਰ, ਕਸੂਰ, ਸਿਆਲਕੋਟ, ਫ਼ੈਸਲਾਬਾਦ, ਨਰੋਵਾਲ ਅਤੇ ਓਕਾਰੇ ਸਮੇਤ ਛੇ ਜ਼ਿਲ੍ਹਿਆਂ ਵਿੱਚ ਫੌਜ ਤਾਇਨਾਤ ਕਰ ਦਿੱਤੀ ਹੈ, ਤਾਂ ਜੋ ਰਾਹਤ ਤੇ ਬਚਾਅ ਕਾਰਵਾਈ ਤੇਜ਼ ਕੀਤੀ ਜਾ ਸਕੇ।

ਪੰਜਾਬ ਦੇ ਹੋਮ ਡਿਪਾਰਟਮੈਂਟ ਮੁਤਾਬਕ, ਭਾਰਤ ਵੱਲੋਂ ਥੀਨ ਡੈਮ ਤੋਂ ਲਗਭਗ 2 ਲੱਖ 10 ਹਜ਼ਾਰ ਕਿਊਸੈਕ ਪਾਣੀ ਛੱਡਿਆ ਗਿਆ ਹੈ। ਇਸ ਸਮੇਂ ਜਸਸਰ ’ਤੇ ਰਾਵੀ ਦਰਿਆ ਵਿੱਚ 1,42,000 ਕਿਊਸੈਕ ਦੀ ਉੱਚੀ ਬਾੜ੍ਹ ਹੈ, ਜਦਕਿ ਸ਼ਾਹਦਰਾ ’ਤੇ 56,000 ਕਿਊਸੈਕ ਪਾਣੀ ਰਿਕਾਰਡ ਕੀਤਾ ਗਿਆ ਹੈ। ਅਗਲੇ 48 ਘੰਟਿਆਂ ਵਿੱਚ ਹੋਰ ਵੱਡੀ ਬਾੜ੍ਹ ਆਉਣ ਦੀ ਸੰਭਾਵਨਾ ਹੈ, ਜੋ ਜਸਸਰ, ਸ਼ਾਹਦਰਾ ਅਤੇ ਹੈੱਡ ਬੱਲੋਕੀ ਰਾਹੀਂ ਗੁਜ਼ਰ ਸਕਦੀ ਹੈ।

ਪੀ.ਡੀ.ਐਮ.ਏ (PDMA) ਦੇ ਮੁਤਾਬਕ, ਭਾਰੀ ਪਾਣੀ ਦੇ ਆਉਣ ਕਾਰਨ ਨਜ਼ਦੀਕੀ ਇਲਾਕਿਆਂ ਦੇ ਲੋਕਾਂ ਨੂੰ ਤੁਰੰਤ ਸੁਰੱਖਿਅਤ ਥਾਵਾਂ ’ਤੇ ਖਾਲੀ ਕਰਵਾਇਆ ਜਾ ਰਿਹਾ ਹੈ। ਮਸਜਿਦਾਂ ਵਿੱਚ ਐਲਾਨ ਕਰਕੇ ਲੋਕਾਂ ਨੂੰ ਚੇਤਾਵਨੀ ਦਿੱਤੀ ਜਾ ਰਹੀ ਹੈ, ਜਦਕਿ ਰੇਸਕਿਊ 1122, ਸਿਵਲ ਡਿਫੈਂਸ, ਪੁਲਿਸ ਅਤੇ ਸਥਾਨਕ ਪ੍ਰਸ਼ਾਸਨ ਰਾਹਤ ਕਾਰਵਾਈਆਂ ਵਿੱਚ ਪੂਰੀ ਤਰ੍ਹਾਂ ਸਰਗਰਮ ਹਨ।

ਇਸ ਦੇ ਨਾਲ ਹੀ, ਪੰਜਾਬ ਸਰਕਾਰ ਨੇ ਸਾਰੇ ਸਬੰਧਤ ਅਧਿਕਾਰੀਆਂ ਨੂੰ ਹਦਾਇਤ ਦਿੱਤੀ ਹੈ ਕਿ ਬਾੜ੍ਹ ਦੀ ਸਥਿਤੀ ’ਤੇ 24 ਘੰਟੇ ਨਿਗਰਾਨੀ ਰੱਖੀ ਜਾਵੇ ਅਤੇ ਲੋਕਾਂ ਦੀ ਜਾਨ ਤੇ ਮਾਲ ਦੀ ਸੁਰੱਖਿਆ ਲਈ ਹਰ ਸੰਭਵ ਉਪਾਅ ਕੀਤੇ ਜਾਣ।