ਬਾਜੌਰ ਤੇ ਦੱਖਣੀ ਵਜ਼ੀਰਿਸਤਾਨ ਵਿੱਚ ਭਿਆਨਕ ਝੜਪਾਂ, ਪਾਕ ਫੌਜ ਨੂੰ ਵੱਡਾ ਨੁਕਸਾਨ

ਰਾਵਲਪਿੰਡੀ, 13 ਸਤੰਬਰ(ਅਲੀ ਇਮਰਾਨ ਚੱਠਾ)

ਪਿਛਲੇ ਤਿੰਨ ਦਿਨਾਂ (10 ਤੋਂ 13 ਸਤੰਬਰ) ਦੌਰਾਨ ਬਾਜੌਰ ਅਤੇ ਦੱਖਣੀ ਵਜ਼ੀਰਿਸਤਾਨ ਵਿੱਚ ਕੀਤੀਆਂ ਗਈਆਂ ਖੁਫ਼ੀਆ ਜਾਣਕਾਰੀ ਅਧਾਰਿਤ ਕਾਰਵਾਈਆਂ (IBOs) ਵਿੱਚ 12 ਪਾਕਿਸਤਾਨੀ ਸਿਪਾਹੀ ਸ਼ਹੀਦ ਹੋ ਗਏ ਅਤੇ 35 ਦਹਿਸ਼ਤਗਰਦ ਮਾਰੇ ਗਏ, ਇਹ ਜਾਣਕਾਰੀ ਆਈਐਸਪੀਆਰ ਨੇ ਦਿੱਤੀ।

ਬਾਜੌਰ ਵਿੱਚ ਸੁਰੱਖਿਆ ਫ਼ੌਜਾਂ ਨੇ ਮੁਕਾਬਲੇ ਦੌਰਾਨ 22 ਦਹਿਸ਼ਤਗਰਦ ਮਾਰੇ, ਜਦਕਿ ਦੱਖਣੀ ਵਜ਼ੀਰਿਸਤਾਨ ਵਿੱਚ ਹੋਈ ਝੜਪ ਵਿੱਚ 13 ਦਹਿਸ਼ਤਗਰਦਾਂ ਦਾ ਖ਼ਾਤਮਾ ਹੋਇਆ। ਕਾਰਵਾਈ ਦੌਰਾਨ ਵੱਡੀ ਮਾਤਰਾ ਵਿੱਚ ਹਥਿਆਰ, ਗੋਲਾਬਾਰੂਦ ਅਤੇ ਵਿਸਫੋਟਕ ਵੀ ਬਰਾਮਦ ਹੋਏ।

ਆਈਐਸਪੀਆਰ ਨੇ ਮਾਰੇ ਗਏ ਲੜਾਕਿਆਂ ਨੂੰ “ਫ਼ਿਤਨਾ ਅਲ-ਖ਼ਵਾਰਜ” ਦਾ ਮੈਂਬਰ ਦੱਸਿਆ ਅਤੇ ਦਾਅਵਾ ਕੀਤਾ ਕਿ ਇਹ ਭਾਰਤੀ ਸਹਾਇਤਾ ਪ੍ਰਾਪਤ ਦਹਿਸ਼ਤਗਰਦ ਸਨ। ਇਸ ਨੇ ਇਹ ਵੀ ਕਿਹਾ ਕਿ ਅਫ਼ਗਾਨ ਨਾਗਰਿਕ ਵੀ ਸਰਹੱਦ ਪਾਰ ਦਹਿਸ਼ਤਗਰਦੀ ਨੂੰ ਵਧਾਉਣ ਵਿੱਚ ਸ਼ਾਮਲ ਸਨ।

ਫੌਜ ਨੇ ਦੁਹਰਾਇਆ ਕਿ ਦਹਿਸ਼ਤਗਰਦੀ ਦੇ ਖ਼ਿਲਾਫ਼ ਲੜਾਈ “ਹਰ ਕੀਮਤ ’ਤੇ” ਜਾਰੀ ਰਹੇਗੀ ਅਤੇ ਸ਼ਹੀਦ ਸਿਪਾਹੀਆਂ ਦੀ ਕੁਰਬਾਨੀ ਵਿਅਰਥ ਨਹੀਂ ਜਾਣ ਦਿੱਤੀ ਜਾਵੇਗੀ। ਸ਼ਹੀਦਾਂ ਦੇ ਅੰਤਿਮ ਸਸਕਾਰ ਫ਼ੌਜੀ ਸਨਮਾਨ ਨਾਲ ਕੀਤੇ ਗਏ।