ਕਾਕਰੋਚ ਜਨਤਾ ਪਾਰਟੀ’ ਅਤੇ ਪੰਜਾਬ ਦੀ ਹੋਂਦ ਦਾ ਸਵਾਲ: ਬਾਹਰੀ ਇਨਕਲਾਬ ਬਨਾਮ ਗੁਰੂ ਦਾ ਫਲਸਫਾ

ਕਾਕਰੋਚ ਜਨਤਾ ਪਾਰਟੀ’ ਅਤੇ ਪੰਜਾਬ ਦੀ ਹੋਂਦ ਦਾ ਸਵਾਲ: ਬਾਹਰੀ ਇਨਕਲਾਬ ਬਨਾਮ ਗੁਰੂ ਦਾ ਫਲਸਫਾ
-ਬਲਵਿੰਦਰ ਪਾਲ ਸਿੰਘ ਪ੍ਰੋਫ਼ੈਸਰ 

​ਪੰਜਾਬ ਦੀ ਸਿਆਸਤ ਅਤੇ ਸਮਾਜਿਕ ਚੇਤਨਾ ਨੇ ਹਮੇਸ਼ਾ ਹੀ ਰਾਸ਼ਟਰੀ ਧਾਰਾ ਦੀਆਂ ਪਾਰਟੀਆਂ ਨੂੰ ਇੱਕ ਵੱਖਰੀ ਕਸੌਟੀ ’ਤੇ ਪਰਖਿਆ ਹੈ। ਅਜੋਕੇ ਦੌਰ ਵਿੱਚ ਜਦੋਂ ਵੱਡੀਆਂ ਰਾਸ਼ਟਰਵਾਦੀ ਪਾਰਟੀਆਂ ਆਪਣੇ ਪ੍ਰਚਾਰ ਸਬੰਧੀ ਢੋਲ-ਧਮੱਕੇ ਨਾਲ ਪੰਜਾਬ ਦੇ ਵਿਹੜੇ ਵਿੱਚ ਪੈਰ ਧਰਦੀਆਂ ਹਨ, ਤਾਂ ਸੂਬੇ ਦੇ ਸੂਝਵਾਨ ਵਰਗ ਵਿੱਚੋਂ ਇੱਕ ਤਿੱਖੀ ਅਤੇ ਵਿਅੰਗਾਤਮਕ ਆਵਾਜ਼ ਉੱਠਦੀ ਹੈ। ਹੁਣ ਰਾਸ਼ਟਰਵਾਦੀ ਪਾਰਟੀ ਇਨਕਲਾਬ ਦੇ ਨਾਮ ਉਪਰ‘ਕਾਕਰੋਚ ਜਨਤਾ ਪਾਰਟੀ’ ਭਾਰਤ ਵਿਚ ਉਭਰ ਰਹੀ ਹੈ ।

​ਸਵਾਲ ਕਿਸੇ ਇੱਕ ਰਾਸ਼ਟਰਵਾਦੀ ਦਲ ਦਾ ਨਹੀਂ, ਸਗੋਂ ਉਸ ਸੋਚ ਦਾ ਹੈ ਜਿਸ ਦਾ ਪੰਥ, ਪੰਜਾਬ ਅਤੇ ਇੱਥੋਂ ਦੇ ਜ਼ਮੀਨੀ ਮਾਮਲਿਆਂ ਨਾਲ ਕੋਈ ਸੱਚਾ ਸਰੋਕਾਰ ਨਹੀਂ ਹੈ। ਇਤਿਹਾਸ ਗਵਾਹ ਹੈ ਕਿ ਪੰਜਾਬ ਤੋਂ ਬਾਹਰ ਪੈਦਾ ਹੋਏ ਕਥਿਤ ਇਨਕਲਾਬਾਂ ਜਾਂ ਨਾਅਰਿਆਂ ਨੇ ਜਦੋਂ ਵੀ ਇਸ ਖਿੱਤੇ ਨੂੰ ਆਪਣੇ ਕਲਾਵੇ ਵਿੱਚ ਲੈਣ ਦੀ ਕੋਸ਼ਿਸ਼ ਕੀਤੀ, ਤਾਂ ਬਦਲੇ ਵਿੱਚ ਪੰਜਾਬ ਨੂੰ ਸਿਰਫ਼ ਧੋਖਾ ਅਤੇ ਆਪਣੇ ਹੱਕਾਂ ਦਾ ਘਾਣ ਹੀ ਦੇਖਣਾ ਪਿਆ। ਚਾਹੇ ਉਹ ਪਾਣੀਆਂ ਦਾ ਮਸਲਾ ਹੋਵੇ, ਖੇਤੀਬਾੜੀ ਦਾ ਸੰਕਟ ਹੋਵੇ, ਜਾਂ ਸੂਬਾਈ ਖੁਦਮੁਖਤਿਆਰੀ ਦਾ ਸਵਾਲ—ਰਾਸ਼ਟਰਵਾਦ ਦੇ ਵੱਡੇ ਏਜੰਡਿਆਂ ਨੇ ਹਮੇਸ਼ਾ ਪੰਜਾਬ ਦੇ ਖੇਤਰੀ ਹਿੱਤਾਂ ਦੀ ਬਲੀ ਲਈ ਹੈ।

​ਅੱਜ ਪੰਜਾਬੀਆਂ ਨੂੰ ਇਹ ਸਮਝਣ ਦੀ ਸਖ਼ਤ ਲੋੜ ਹੈ ਕਿ ਸਾਨੂੰ ਬਾਹਰੋਂ ਉਧਾਰ ਲਏ ਗਏ ਇਨਕਲਾਬਾਂ ਜਾਂ ਸਿਆਸੀ ਮਾਡਲਾਂ ਦੀ ਲੋੜ ਨਹੀਂ ਹੈ। ਪੰਜਾਬ ਦੀ ਆਪਣੀ ਇੱਕ ਸੁਤੰਤਰ, ਸਵੈ-ਮਾਣ ਵਾਲੀ ਅਤੇ ਇਨਕਲਾਬੀ ਹੋਂਦ ਹੈ, ਜਿਸ ਦੀਆਂ ਜੜ੍ਹਾਂ ਕਿਸੇ ਰਾਜਨੀਤਿਕ ਦਫ਼ਤਰ ਵਿੱਚ ਨਹੀਂ, ਬਲਕਿ ਸਾਡੇ ਗੁਰੂ ਸਾਹਿਬਾਨਾਂ ਦੇ ਸਿਰਜੇ ਇਨਕਲਾਬ ਵਿੱਚ ਹਨ।

​ਸਾਨੂੰ ਇਹ ਕਦੇ ਨਹੀਂ ਭੁੱਲਣਾ ਚਾਹੀਦਾ ਕਿ ਗੁਰੂ ਸਤਿਗੁਰੂ ਗੋਬਿੰਦ ਸਿੰਘ ਜੀ ਨੇ ਇਸ ਧਰਤੀ ਦੇ ਜਾਇਆਂ ਨੂੰ ‘ਗਿੱਦੜਾਂ ਤੋਂ ਸ਼ੇਰ’ ਬਣਾਉਣ ਦਾ ਮਹਾਨ ਕਾਰਜ ਕੀਤਾ ਸੀ। ਗੁਰੂ ਸਾਹਿਬ ਦਾ ਫਲਸਫਾ ਮਨੁੱਖ ਨੂੰ ਨਿਡਰਤਾ, ਅਣਖ ਅਤੇ ਸਵੈ-ਮਾਣ ਨਾਲ ਜਿਊਣਾ ਸਿਖਾਉਂਦਾ ਹੈ। ਸਿਆਸੀ ਤਾਕਤ ਜਾਂ ਵੋਟ-ਬੈਂਕ ਦੀ ਖ਼ਾਤਰ ਕਾਇਰਤਾ ਅਖਤਿਆਰ ਕਰਨਾ ਜਾਂ ‘ਕਾਕਰੋਚ’ ਵਾਂਗ ਰੇਂਗਣ ਵਾਲੀ ਮਾਨਸਿਕਤਾ ਨੂੰ ਕਬੂਲ ਕਰਨਾ ਪੰਜਾਬ ਦੇ ਮੂਲ ਸੁਭਾਅ ਦੇ ਬਿਲਕੁਲ ਉਲਟ ਹੈ।

​ਸਮੇਂ ਦੀ ਮੁੱਖ ਮੰਗ ਇਹ ਹੈ ਕਿ ਪੰਜਾਬ ਦੇ ਲੋਕ, ਖ਼ਾਸ ਕਰਕੇ ਨੌਜਵਾਨ ਪੀੜ੍ਹੀ, ਆਪਣੀ ਇਸ ਅਸਲ ਹੋਂਦ ਨੂੰ ਪਛਾਣੇ। ਸਾਨੂੰ ਇਹ ਚੇਤੇ ਰੱਖਣਾ ਹੋਵੇਗਾ ਕਿ ਅਸੀਂ ‘ਗੁਰੂ ਦੇ ਸ਼ੇਰ’ ਹਾਂ। ਜਦੋਂ ਤੱਕ ਪੰਜਾਬ ਆਪਣੀ ਸੱਭਿਆਚਾਰਕ ਅਤੇ ਧਾਰਮਿਕ ਪਛਾਣ ਦੇ ਇਸ ਸੁਨਹਿਰੀ ਸਿਧਾਂਤ ’ਤੇ ਪਹਿਰਾ ਦਿੰਦਾ ਰਹੇਗਾ, ਉਦੋਂ ਤੱਕ ਕੋਈ ਵੀ ਬਾਹਰੀ ਸਿਆਸੀ ਪਾਰਟੀ ਜਾਂ ਮੌਕਾਪ੍ਰਸਤ ਵਿਚਾਰਧਾਰਾ ਪੰਜਾਬੀਆਂ ਦੀ ਅਣਖ ਨੂੰ ਖ਼ਰੀਦ ਨਹੀਂ ਸਕੇਗੀ। ਬਾਹਰੀ ਪ੍ਰਭਾਵਾਂ ਤੋਂ ਸੁਚੇਤ ਹੋ ਕੇ ਆਪਣੇ ਮੂਲ ਨਾਲ ਜੁੜਨਾ ਹੀ ਅੱਜ ਪੰਜਾਬ ਦੇ ਉੱਜਲ ਭਵਿੱਖ ਦੀ ਇੱਕਮਾਤਰ ਗਾਰੰਟੀ ਹੈ।ਸਰਬਤ ਦੇ ਭਲੇ ਦੀ ਭਾਵਨਾ , ਸਾਂਝੀਵਾਲਤਾ ਸਾਡੀ ਤਾਕਤ ਹੈ।