ਪੰਜਾਬ ਸਰਕਾਰ ਵੱਲੋਂ ਸਮਾਜਕ ਸ਼ਾਮਿਲਤਾ ਵੱਲ ਵੱਡਾ ਕਦਮ — ਪਬਲਿਕ ਟਰਾਂਸਪੋਰਟ ਲਈ 1100 ਵ੍ਹੀਲਚੇਅਰਾਂ ਵੰਡੀਆਂ

ਲਾਹੌਰ ,28 ਅਕਤੂਬਰ, ਨਜ਼ਰਾਨਾ ਟਾਈਮਜ਼
 

ਮੁੱਖ ਮੰਤਰੀ ਪੰਜਾਬ ਮਰਿਆਮ ਨਵਾਜ਼ ਸ਼ਰੀਫ਼ ਦੇ ਖ਼ਾਸ ਹਦਾਇਤਾਂ ’ਤੇ ਸੋਸ਼ਲ ਵੈਲਫੇਅਰ ਵਿਭਾਗ ਵੱਲੋਂ ਟਰਾਂਸਪੋਰਟ ਵਿਭਾਗ ਨੂੰ 1100 ਵ੍ਹੀਲਚੇਅਰਾਂ ਸੌਂਪੀਆਂ ਗਈਆਂ ਹਨ, ਤਾਂ ਜੋ ਅਪਾਹਜ ਵਿਅਕਤੀਆਂ ਨੂੰ ਸਰਕਾਰੀ ਟਰਾਂਸਪੋਰਟ ਦੀ ਵਰਤੋਂ ਵਿੱਚ ਆਸਾਨੀ ਮਿਲ ਸਕੇ।
ਇਸ ਮੌਕੇ ‘ਤੇ ਇਕ ਖਾਸ ਸਮਾਰੋਹ ਦਾ ਆਯੋਜਨ ਕੀਤਾ ਗਿਆ ਜਿਸ ਵਿਚ ਸਮਾਜਿਕ ਭਲਾਈ ਤੇ ਬੈਤੁਲ ਮਾਲ ਮੰਤਰੀ ਸੋਹੈਲ ਸ਼ੌਕਤ ਬੱਟ ਅਤੇ ਟਰਾਂਸਪੋਰਟ ਮੰਤਰੀ ਬਿਲਾਲ ਅਕਬਰ ਖ਼ਾਨ ਨੇ ਮੁੱਖ ਮਹਿਮਾਨਾਂ ਵਜੋਂ ਸ਼ਮੂਲੀਅਤ ਕੀਤੀ।
ਸਮਾਰੋਹ ਦੌਰਾਨ ਇਲੈਕਟ੍ਰਿਕ ਵ੍ਹੀਲਚੇਅਰਾਂ, ਤਿੰਨ ਪਹੀਆ ਸਾਈਕਲਾਂ ਤੇ ਮੋਟਰਾਈਜ਼ਡ ਤਿੰਨ ਪਹੀਆ ਵਾਹਨ ਲਾਹੌਰ, ਗੁਜਰਾਂਵਾਲਾ, ਫੈਸਲਾਬਾਦ ਅਤੇ ਸਾਹਿਵਾਲ ਡਿਵੀਜ਼ਨਾਂ ਦੇ ਅਪਾਹਜ ਵਿਅਕਤੀਆਂ ਵਿੱਚ ਵੰਡੇ ਗਏ।ਇਸ ਮੌਕੇ ‘ਤੇ ਮੰਤਰੀ ਸੋਹੈਲ ਸ਼ੌਕਤ ਬੱਟ ਨੇ ਕਿਹਾ ਕਿ ਸਮਾਜ ਦੇ ਕਮਜ਼ੋਰ ਤੇ ਹਾਸ਼ੀਏ ‘ਤੇ ਰਹਿਣ ਵਾਲੇ ਵਰਗਾਂ ਦੀ ਭਲਾਈ ਪੰਜਾਬ ਸਰਕਾਰ ਦੀ ਸਭ ਤੋਂ ਵੱਡੀ ਤਰਜੀਹ ਹੈ।
ਉਨ੍ਹਾਂ ਕਿਹਾ, “ਅਸੀਂ ਵਿਸ਼ੇਸ਼ ਬੱਚਿਆਂ ਨੂੰ ਸਿੱਖਿਆ ਅਤੇ ਰੋਜ਼ਾਨਾ ਜ਼ਿੰਦਗੀ ਵਿੱਚ ਖੁਦਮੁਖਤਿਆਰੀ ਦੇਣ ਲਈ ਕੰਮ ਕਰ ਰਹੇ ਹਾਂ।”
ਉਨ੍ਹਾਂ ਇਹ ਵੀ ਜੋੜਿਆ ਕਿ ਮੁੱਖ ਮੰਤਰੀ ਮਰਿਆਮ ਨਵਾਜ਼ ਸ਼ਰੀਫ਼ ਦੀ ਦੂਰਅੰਦੇਸ਼ ਰਹਿਨੁਮਾਈ ਹੇਠ ਸੋਸ਼ਲ ਵੈਲਫੇਅਰ ਵਿਭਾਗ ਇਨਸਾਨੀ ਖ਼ਿਦਮਤ ਨੂੰ ਹੋਰ ਵਿਸਤਾਰ ਦੇ ਰਿਹਾ ਹੈ।
ਟਰਾਂਸਪੋਰਟ ਮੰਤਰੀ ਬਿਲਾਲ ਅਕਬਰ ਖ਼ਾਨ ਨੇ ਕਿਹਾ ਕਿ ਮੁੱਖ ਮੰਤਰੀ ਦੇ ਕਦਮ ਲੋਕੀ ਸੁਖ ਸਹੂਲਤ ਅਤੇ ਸ਼ਾਮਿਲਤਾ ਵੱਲ ਸ਼ਾਨਦਾਰ ਅਗਾਂਹ ਵਧਣ ਦਾ ਪ੍ਰਤੀਕ ਹਨ।ਉਨ੍ਹਾਂ ਦੱਸਿਆ ਕਿ ਖ਼ਾਸ ਬੱਸਾਂ ਵਿੱਚ ਅਪਾਹਜ ਵਿਅਕਤੀਆਂ ਲਈ ਵਿਸ਼ੇਸ਼ ਸਹੂਲਤਾਂ ਤੇ ਘੱਟ ਕਿਰਾਏ ਰੱਖੇ ਗਏ ਹਨ।
ਉਨ੍ਹਾਂ ਇਸ ਗੱਲ ਤੇ ਵੀ ਜ਼ੋਰ ਦਿੱਤਾ ਕਿ ਵਿਭਾਗਾਂ ਵਿਚਕਾਰ ਤਾਲਮੇਲ ਨਾਲ ਹੀ ਨਾਗਰਿਕਾਂ ਦੀ ਭਲਾਈ ਸੰਭਵ ਹੈ। ਸਰਗੋਧਾ ਵਿੱਚ ਇੱਕ ਔਰਤ ਨੂੰ ਬੱਸ ਵਿੱਚ ਚੜ੍ਹਨ ਵਿੱਚ ਦਿੱਕਤ ਆਉਣ ਵਾਲੇ ਵਾਇਰਲ ਮਾਮਲੇ ਦਾ ਹਵਾਲਾ ਦਿੰਦਿਆਂ ਉਨ੍ਹਾਂ ਨੇ ਮੁੱਖ ਮੰਤਰੀ ਦੀ ਫ਼ੌਰੀ ਕਾਰਵਾਈ ਅਤੇ ਉਸ ਔਰਤ ਲਈ ਵ੍ਹੀਲਚੇਅਰ ਦੀ ਪ੍ਰਦਾਨਗੀ ਨੂੰ ਜਵਾਬਦੇਹ ਹਕੂਮਤ ਦੀ ਮਿਸਾਲ ਕਿਹਾ।
ਸਮਾਰੋਹ ਦਾ ਅੰਤ ਪੰਜਾਬ ਭਰ ਵਿੱਚ ਪਹੁੰਚਯੋਗਤਾ ਅਤੇ ਸ਼ਾਮਿਲਤਾ ਵਧਾਉਣ ਦੇ ਨਵੇਂ ਅਜ਼ਮ ਨਾਲ ਕੀਤਾ ਗਿਆ।